Un mozo está a ser buscado no río Miño tras envorcar o kaiac no que viaxaba co seu curmán, preto do encoro dos Peares (Carballedo). Un deles conseguiu chegar á beira e pedir axuda, pero perdeu de vista ao outro.
O aviso ao 112 Galicia produciuse arredor das 16:30 horas, activándose de inmediato un amplo operativo de rescate no que participan servizos sanitarios, Garda Civil, varios parques de bombeiros, grupos de emerxencias e voluntarios de Protección Civil, con embarcacións, dron e cámara térmica.
Segundo as primeiras informacións, os mozos saíran do embarcadoiro dos Peares e sufriron o accidente ao regresar. As tarefas de busca complícanse debido á difícil orografía da zona, que impide o acceso por terra, polo que só se consideran viables medios acuáticos e aéreos.
