O Galician Freaky Film Festival (GFFF) chega a Codex Cinema. Esta festa do cinema e da cultura freak celebrará a finais deste mesmo mes de setembro a súa nova edición convertido nunha referencia a nivel galego do cinema de terror, ciencia ficción, fantasía e serie B. Catro anos de certames de curtas, homenaxes, eventos especiais e moita festa que queremos celebrar con vós en Codex cun evento moi especial no que poderemos ver unha selección de curtas destacadas, introducidas pola equipa do festival.
Un pequeno festival dentro de Codex Cinema que contará con moitas sorpresas e un espírito festivo no que mostraremos o auxe deste certame que ten lugar cada outono en Vigo desde hai un lustro cunha programación atrevida e moi coidada amosando pezas curtas de festivais tan recoñecidos como Clermont- Ferrand, Sitges, Annecy, Sundance ou Toronto. E para acompañar este evento tan especial contaremos cun recital sonoro a cargo do músico Javier Miranda, que presentará o seu último disco Strange Imperfection nunha orixinal sesión audiovisual que mestura a electrónica minimalista con influencias do rock progresivo dos 70, o space-rock e a música ambient con elementos performativos e proxección de vídeo. Tanto as proxeccións como o espectáculo musical terán lugar o próximo sábado día 18 e será necesario reservar entrada debido ao aforo reducido.
