" />

Castiñeira reivindica o seu contrato público cos lucenses acompañado de Xosé Manuel Barreiro, Núñez Feijoo e a Ministra Báñez

O candidato do Partido Popular á alcaldía de Lugo, Jaime Castiñeira, reivindicou esta tarde no mitin central do partido o seu “contrato público cos lucenses fronte ao acordo secreto de Orozco con Besteiro para irse correndo ao Senado ao día seguinte das eleccións municipais”.

Durante a súa intervención, no que tamén participaron os presidentes autonómico e provincial do partido, Alberto Núñez Feijoo e Xosé Manuel Barreiro, respectivamente, e a Ministra de Emprego, Fátima Báñez, Jaime Castiñeira degrañou os dez compromisos do seu “contrato”, “centrado na creación de emprego e en mellorar a atención ás persoas”.

O candidato reiterou que dimitirá se dentro de catro anos non ten cumprido alomenos un 90% deste decálogo de medidas, ás que tamén incorporou o rural “cun tratamento concreto e específico porque as parroquias teñen as súas necesidades concretas e específicas”: o remate do PXOM, a mellora das condicións das pistas ou máis servizos para o rural como saneamento e telefonía móbil.

“É un contrato blindado cos lucenses que estou seguro de que moitos veciños asinarán este domingo co seu voto nas urnas”, asegurou o candidato popular, quen recoñeceu que “sei que a palabra dos políticos hoxe non vale moito, pero aprendín da miña familia a ser honrado e que unha persoa vale o que vale a súa palabra”.

Castiñeira asegurou tamén que “estamos a cinco días de facer xustiza e de facer historia”: xustiza “porque é o momento de valorar os 16 anos de Orozco e onde nos situaron a Lugo nos informativos nacionais polas imputacións por corrupción, polos enchufes que recoñeceu, polos sobornos do señor Liñares ou pola folga de lixo máis longa”; e historia “porque xuntos conseguiremos recuperar a alcaldía para o PP e para que Lugo recupere a súa boa imaxe”.

Doutra banda, Jaime Castiñeira reivindicou “un goberno estable” do PP “como a única garantía de que Lugo empece a ser unha cidade de oportunidades e como o único que asegura o crecemento e a mellora da calidade de vida dos lucenses”, dado que “o domingo hai nove partidos pero só dúas opcións: ou goberna Castiñeira ou Lugo é ingobernable”. “¿Se non son eu alcalde, quen vai ser alcalde? Nin se sabe”, subliñou. “Todos os demais partidos preséntanse contra nós e o seu obxectivo non é gobernar senón impedir que nós gobernemos”, aseverou o candidato popular.

Por último, Castiñeira advertiu aos asistentes que “conseguir esta oportunidade está nas nosas mans e depende de nós”, xa que aínda que “o voso voto é imprescindible, non chega”. “Lugo non volverá estar gobernada polo PP se non somos capaces de convencer aos nosos veciños, aos nosos amigos e aos nosos compañeiros de traballo”, subliñou, ao tempo que trasladou que “estamos aí, a piques de conseguir o obxectivo da alcaldía”, polo que os instou a “evitar que nos pase o mesmo que hai catro anos, cando quedamos por 400 votos ás portas do goberno”.

“Pídovos que pidades o voto para o PP mirando aos ollos aos lucenses e explicándolles que, fronte aos imputados por corrupción, aquí tedes un candidato honrado e honesto; que aquí hai un candidato ilusionado, con ganas, con proxecto e cun equipo moi capaz; e que fronte aos que só son pasado, nós somos presente e sobre todo futuro”, concluíu Castiñeira.

No mitín interviu tamén o Presidente do Partido Popular de Lugo e voceiro do GPP no Senado, que logo de pedir o voto para Jaime Castiñeira “para conseguir un verdadeiro cambio na cidade de Lugo”. Asemade insistiu en que o Partido Popular non se opón a que haxa hemodinámica 24 horas no HULA. Iso, dixo José Manuel Barreiro, é “totalmente falso” e lembrou que foi o PP o que construíu en Lugo  un hospital punteiro en España “ao que pouco a pouco fomos dotando de novos servizos e niso seguiremos, traballando como formigas mentres outros fan de cigarras”.

O Presidente Provincial do PP lembrou que a Xunta acaba de confirmar a creación do rexistro galego do infarto agudo de miocardio “que nace e se desenvolverá baixo o criterio unánime de todos os xefes de servizo de cardioloxía” e insistiu en que será a comisión de seguimento dese rexistro e, polo tanto, “a de profesionais” a que marque “cómo atender ás persoas que sofren infarto agudo de miocardio”.

José Manuel Barreiro tamén quixo lembrar que no 2006 o PSdeG votou no Parlamento de Galicia en contra dunha proposta do PP que reclamaba para o hospital de Lugo os mesmos servizos que agora piden dende a Plataforma en defensa do HULA. “Dende o PP traballamos para mellorar a sanidade pública e preocupámonos cada día pola saúde dos nosos veciños pero o que non facemos nunca é empregar a súa saúde para gañar votos”, matizou Barreiro.  “A todos eses políticos que agora se fan a foto coa camiseta eu lles digo dende aquí que unha cousa é poñer a camiseta e outra sudala”, matizou o líder dos populares lucenses.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo