" />

… E van 38 asasinatos machistas

Este mércores, de novo, os medios audiovisuais incluíron entre as súas primeiras noticias o asasinato machista numero 38 desde o comezo do presente ano, publicando todo tipo de detalles, animando a denunciar calquera agresión e publicando o número gratuíto ao que chamar no caso de coñecer algún delito deste tipo.

Cada vez que escoito unha noticia así, e van trinta e oito neste ano, lembro o acontecido na radio lucense a comezos dos anos setenta coas noticias relacionadas cos suicidios.

Daquela, coas novas relacionados co tráfico (nada que ver coas cifras da actualidade), as que proporcionaban os xulgados, policía e garda civil, dábase conta cando un pasamento se debía a un suicidio, mencionando só as iniciais do suicida para gardar as formas, pero indicando o lugar e circunstancias que procederan.

Había moitos suicidios, especialmente no outono-inverno, que seguro se vían acrecentados pola soidade dos que ían quedando sos nas aldeas e nos pobos naquel tempo que empezaba a despoboación que agora xa é unha traxedia. E dabamos a noticia ata que a través de especialistas na materia soubemos que había un fenómeno de retroalimentación, e que as novas de suicidio animaban ou podían animar aos indecisos a tomar unha decisión fatal en base ao exemplo que, aínda que lonxano, lles chegaba a través dos medios informativos.

E deixaron de ser noticia os suicidios, e pasaron a ser cifras estadísticas dos xulgados, da garda civil, das institucións sanitarias que as farán chegar onde proceda para a toma das decisión políticas que corresponda.

Se a noticia dun suicidio podía animar a igual decisión a un enfermo de soidade ou de enfermidade física, para min que as novas repetidas de asasinatos machistas poden provocar accións parecidas de enfermos ou tolos indecisos que toman exemplo do que escoitan como funesta solución para os seus problemas supostos ou existentes.

A censura informativa sobre un tema así pode non sentarlle ben á liberdade nin ás persoas normais, pero pode ser totalmente indicada para persoas con problemas mentais que poden tomar exemplo dos asasinos que parecen proliferar. Tema tan importante e urxente, ben merece a pena de pensar seriamente nel.

 

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo