Nunha reunión celebrada na capital chairega, á que asistiron Psoe, Vilalba Aberta e BNG, os representantes de cada partido acordaron asinar un documento onde se comprometen a investir a Elba Veleiro como alcaldesa para o mandato 2023-2027. Malia que o pacto compromete ás tres formacións políticas, só os socialistas e Vilalba Aberta entrarán no goberno municipal, o BNG declinou tal posibilidade.
No documento recóllense os principios xerais de actuación, as medidas de aplicación transversal das distintas área de goberno, así como as medidas de acción programática a curto e medio prazo.
Dito acordo recolle tamén as delegacións de área que corresponden a cada formación política. Polo tanto, o Grupo Municipal Socialista de Vilalba será o responsable de xestionar; infraestruturas urbanas, medio ambiente urbano e natural, servizos sociais, economía, facenda, servizos municipais, réxime interior, seguridade cidadá, feiras, mercados, promoción do deporte, igualdade e xuventude. E no que respecta a Vilalba Aberta levará as areas de: Urbanismo, infraestruturas rurais e planeamento industrial, cultura, comercio, turismo e promoción da lingua.
Comunicado do PP
Tras coñecerse o acordo, o PP de Vilalba emitiu un comunicado de prensa no que subliña “as tres forzas da esquerda quedan retratadas xa que despois dos desencontros entre PSOE e Vilalba Aberta o único interese por reeditar – nesta ocasión apoiado polo BNG- o pacto que romperon no pasado mandato é evitar que goberne o PP”
Poren, Sandra Vázquez traslada o seu respecto ao resto de grupos da corporación municipal e comprométese a traballar, xunto aos seus compañeiros, “en beneficio de Vilalba e os vilalbeses”
A popular aclara que “o PP amosou dende o comezo vontade de diálogo coas outras tres forzas políticas das que dúas finalmente se reuniron cos populares -unha delas evitou unha segunda reunión- e a outra xa rexeitou falar co grupo maioritario na corporación”
