Unha persoa foi evacuada este venres en helicóptero medicalizado despois de sufrir unha caída cando circulaba co seu patinete no concello de Castroverde. O ferido atopábase inconsciente cando foi localizado por un particular, que alertou ao 112 Galicia.
O accidente produciuse arredor das 09.40 horas na estrada LU-P-1201, á altura do quilómetro 6,5, ao seu paso pola parroquia da Pumarega.
Segundo informou o 112 Galicia, foi un particular quen deu o aviso tras atopar a vítima inconsciente no lugar do sinistro. De inmediato, desde a sala de operacións activouse un operativo no que participaron o Servizo de Urxencias Sanitarias de Galicia-061 e a Garda Civil.
Unha vez no lugar, o persoal sanitario valorou o estado do ferido e decidiu mobilizar o helicóptero medicalizado con base en Ourense para proceder ao seu traslado ao Hospital Universitario Lucus Augusti (HULA), en Lugo.
Polo momento non transcenderon máis datos sobre a identidade da persoa accidentada nin sobre o seu estado de saúde.
