Formación e axudas económicas para que os mozos atopen emprego ou emprendan

O Presidente da Deputación de Lugo, Darío Campos Conde, e o Subsecretario do Ministerio de Industria e Presidente da Escola de Organización Industrial (EOI), José María Jover, asinaron este venres un convenio de 2 millóns de euros para a posta en marcha dun programa de emprego xuvenil na provincia luguesa. No acto, tamén participaron o Deputado provincial Pablo Rivera e o Director Xeral da EOI, Fernando Bayón.

Campos Conde explicou que “esta colaboración permitiranos ofrecer formación a uns 300 mozos lucenses desempregados para contribuír a súa inserción laboral de dúas maneira: por conta allea, é dicir, en empresas e colectivos da provincia; ou favorecendo o emprendemento ao contribuír á posta en marcha dos seus propios negocios”. Jover destacou que “un dos grandes problemas dos mozos é acceder ao mercado laboral. Dende a EOI xa permitimos o desenvolvemento de 48.000 ideas emprendedoras e formamos a 80.000 persoas”.

Tres fases

A programación na provincia de Lugo divídese en tres fases: unha primeira fase de diagnóstico, que arrancará no prazo aproximado dun mes e na que haberá encontros con empresarios, colectivos e mozos de toda a provincia. O seu obxectivo é coñecer as necesidades de ambos os dous sectores para axustar a oferta de emprego á demanda.

A segunda fase será a de formación dos mozos nos nichos de mercado detectados na provincia. Finalmente, a fase de inserción laboral xuvenil. Esta será en empresas ou colectivos da provincia. As contratantes recibirán axudas de ata 4.200 euros para gastos salariais e de seguridade social de 6 meses. No caso de que os mozos opten por abrir os seus negocios, recibirán 3.000 euros.

Requisitos

Os requisitos para optar a esta programación son: estar inscrito no Sistema Nacional de Garantía Xuvenil; ser lucense desempregado de entre 18 e 30 años; e non ter recibido formación de máis de 40 horas nos 3 meses anteriores por parte dunha administración pública.

Financiamento

O programa está dotado de 2 millóns de euros, financiados nun 8,11% pola Deputación de Lugo, son más de 160.000 euros de fondos propios; e nun 91,89% polo Fondo Social Europeo, “que representan máis de 1,8 millóns de euros que, de novo, capta esta institución da Unión Europea grazas e a través da Escola de Organización Industrial”, apuntou o titular provincial.

Segunda colaboración: 5 millóns de euros

Rivera Capón apuntou que “non é a primeira vez que Deputación de Lugo e EOI traballan man a man. Xuntos fomos capaces de pór en marchar un proxecto de 3 millóns de euros, financiados nun 80% por fondos FEDER da Unión Europea, para impulsar a actividade de autónomos, pequenas e medianas empresas. Refírome ao proxecto que chamamos Dinamización do Tecido Produtivo de Lugo. Froito desta iniciativa, 300 empresas da provincia recibiron asesoramento especializado sobre o uso das novas tecnoloxías, comercio electrónico, márketing dixital ou redes sociais, co obxectivo de facer máis competitivos os seus negocios e, polo tanto, conseguir novos beneficios”.

 

 

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo