Un incendio que se orixinou por mor dunha tixola ao lume na cociña dun piso en Lugo deixou a un home ferido, con queimaduras nunha man, ao intentar apagar as lapas.
Segundo puido saber o 112 Galicia, o home foi atendido no lugar polos servizos sanitarios e non tivo que ser trasladado a un centro médico.
Ocorreu na Rúa Río Sil, ás dúas e media desta tarde. A esa hora, unha persoa particular daba conta do incendio ao 112 Galicia. Segundo indicaba na súa comunicación, a cociña da casa estaba ardendo debido a unha tixola que tiñan ao lume e engadía que a vivenda estaba chea de fume.
Axiña, os xestores do CIAE 112 Galicia solicitaron a intervención dos Bombeiros de Lugo, da Policía Local, de Protección Civil e de Urxencias Sanitarias de Galicia-061.
O incendio deixou, ademais, a campá extractora da cociña calcinada por completo.
