" />

José Gaspar Bernández e Antonio Rigueiro presentan o luns un libro sobre as árbores senlleiras dos Ancares e O Courel

O Pazo de San Marcos acollerá o vindeiro luns, 14 de febreiro, a presentación do libro Árbores e formacións senlleiras da contorna dos Ancares e do Courel elaborado por José Gaspar Bernández, doutor en Investigación Agraria e Forestal, e Antonio Rigueiro, catedrático da
Escola Politécnica Superior de Enxeñaría (USC), e co que colaborou a Deputación de Lugo. O acto será ás 19:30 horas no Salón de Actos e será aberto ao público, podendo asistir de balde todas aquelas persoas que estean interesadas en coñecer de primeira man esta nova publicación.

Esta obra inclúese nas Monografías do IBADER (Instituto de Biodiversidade Agraria e Desenvolvemento Rural), no marco da serie Cadernos da Estación Científica do Courel que edita a Universidade de Santiago de Compostela. Céntrase no estudo das árbores e formacións senlleiras das serras dos Ancares e do Courel e da súa contorna, un patrimonio natural que se debe conservar e tamén por en valor, pois constitúe un atractivo turístico máis desta comarca que é xenerosa en valores naturais. Despois de analizar o que se entende por “árbore” ou “formación senlleira”, a publicación aborda o papel dos monumentos vexetais destas serras e da súa contorna ao longo da historia da catalogación dos mesmos en Galicia.

Así mesmo, ofrécese información detallada das 12 árbores/formacións incluídas na actualidade no Catálogo Galego de Árbores Senlleiras, dúas das cales foron recentemente descatalogadas, e tamén doutras 8 que se consideran merecentes de formar parte do catálogo, 3 das cales xa foron propostas. No último apartado inclúense 16 exemplares non documentados ata o momento, como sinal inequívoca de que cun traballo de campo máis exhaustivo novas árbores e formacións senlleiras serían atopadas nestas serras.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo