A alcaldesa de Lugo, a socialista Lara Méndez, aposta por que o PSOE non apoie a investidura de Mariano Rajoy, nin votando a favor nin mediante a abstención. Segundo Méndez, “o PSOE dixo por activa e por pasiva na campaña electoral que non íamos apoiar a investidura de Rajoy”, polo que “sería absurdo” apoiar agora “as políticas que intentamos combater”.
A rexedora descartaba ademais favorecer que Rajoy accedese á presidencia do Goberno pola vía da abstención porque “de forma directa ou indirecta estás dando un apoio”. E engadiu que os socialistas teñen claro que “é necesario un cambio para que o país saia adiante”.
“É necesario un cambio para que o país saia adiante e non seguir con esas políticas destrutivas nas que estamos inmersos dende os últimos anos”, subliñou Lara Méndez.
