Lugo Monumental trasladou ao Concello unha proposta para solucionar o deterioro dos pavimentos do casco histórico, afectados por roturas constantes debido ao uso de lousas pouco axeitadas para unha zona con tráfico frecuente. A asociación advirte de que manter o actual modelo suporía un problema crónico e aposta por substituír progresivamente as lousas por adoquín plano, un material máis resistente e doado de reparar, xa probado con éxito noutros puntos como a Praza da Soidade ou Armanyá.
A entidade lembra que o casco histórico soporta un intenso tránsito de vehículos —residentes, reparto, servizos e transporte público— e critica que non se aprendera da experiencia negativa doutras actuacións, como a de Quiroga Ballesteros. Ademais, Lugo Monumental propón alternativas de mobilidade que permitirían evitar a instalación de cámaras de control e reducir os danos nos pavimentos.
Por outra banda, a asociación reclama a inclusión da Rúanova no plan urxente de reparación de rúas, ao considerar sorprendente que unha das vías máis deterioradas e transitadas do casco histórico non figure entre as actuacións previstas polo Concello.
