Esta mañá a alcaldesa de Lugo procedeu a abrir o paso que comunica o Parque Marcos Cela co Mirador da Volta da Viña.
Un treito que ten tan só dez metros de lonxitude pero que está afectado por un importante desnivel que dificultaba a conexión peonil directa entre ambos espazos e que, agora coa instalación deste paso peonil, consistente un valado de madeira que delimita o percorrido de escaleiras de pedra existentes e que exerce, alén, como punto de apoio.
“A nosa vontade é a de seguir incrementando a accesibilidade da capital e ir habilitando e rexenerando espazos para permitir que a veciñanza poida desprazarse con comodidade por todos eles, buscando unha mobilidade sostible pero tamén racional e sobre todo segura”, sinalou Lara Méndez.
Nese mesmo sentido, a alcaldesa lembrou que, precisamente, este enclave, coincidente co trazado do Carril Bici, conta cun novo paso de peóns intelixente.
A rexedora lucense explicou que este sistema automático se activa cun sensor de presenza, aumentando a intensidade lumínica dun 30 a un 100%, o que provoca unha chamada de atención ao vehículo que se aproxima sobre a existencia dunha persoa que pretende cruzar. Unha mellora que se completa coa súa elevación, mediante un badén, o que obriga á minoración da velocidade.
