Milleiros de persoas acudiron está mañá en Lugo á manifestación convocada pola plataforma galega 8 M. Esta plataforma agrupa a diversos colectivos feministas galegos, que hoxe se manifestaron baixo o lema: “Por todas as mulleres, por todos os dereitos, revolta feminista”.
A manifestación comezou con algo de retraso por mor da masiva asistencia á mesma e percorreu diferentes rúas da cidade. Dende pasadas as doce da mañá, a mobilización que saíu dende diante do edificio administrativo da Xunta de Galicia en Lugo, foi desprazándose pola Ronda da Muralla ata a rúa Montevideo, para seguir pola Praza de Santo Domingo, Rúa do Teatro, e de novo á Ronda da Muralla para rematar na Praza Horta do Seminario.
Nesta praza leuse o manifesto, no que se denunciou toda forma de explotación contra das mulleres, e fíxose un chamamento para que a xornada do día 8 teña un seguimento masivo.