Unha persoa faleceu despois de caerlle enriba unha cancela na parroquia vilalbesa de San Mamede de Oleiros. Foi un veciño da vítima quen chamou ao 112 Galicia ás 12:45 horas deste mediodía para informar do sucedido.
Nada máis ter constancia dos feitos, os xestores do Centro Integrado de Atención ás Emerxencias de Galicia puxeron a situación en coñecemento dos profesionais sanitarios que, debido á gravidade da situación, informaron da mobilización do helicóptero medicalizado con base en Santiago para prestar auxilio á persoa ferida.
Desafortunadamente, unha vez no lugar do incidente, o equipo médico de Urxencias Sanitarias de Galicia-061 soamente puido confirmar o seu falecemento.
Tamén foron informados os Bombeiros de Vilalba e os efectivos do Servizo Municipal de Protección Civil da localidade. Para aclarar as circunstancias do suceso, desde o 112 solicitouse a intervención dos axentes da Garda Civil.
