A intersección entre a rúa Afonso X o Sabio e a Rolda de Fingoi conta desde hoxe cunha nova rotonda que substitúe os semáforos que regulaban o paso ata o de agora, o que permitirá unha circulación máis fluída nesta zona da cidade de Lugo.
O cruzamento da vía dedicada a Afonso X o Sabio coa Rolda de Fingoi deixou atrás a súa antiga configuración, caracterizada por un espazo pouco integrado visualmente coa contorna. Coa nova actuación, o punto gaña tanto en funcionalidade como en estética, mellorando a integración urbana, reforzando a seguridade viaria e reducindo os tempos de espera para os vehículos.
Ademais da eliminación dos semáforos, o proxecto incluíu a creación dunha área axardinada central e o redeseño dos accesos para garantir unha maior protección dos peóns e manter a continuidade da rúa. Tamén se adaptou o sistema de iluminación ao novo trazado mediante a instalación de luminarias LED. A seguinte fase, máis complexa, consistirá na modificación da rede de saneamento para asegurar unha drenaxe axeitada en toda a intersección.
