Alberto Núñez Feijóo, presidente da Xunta de Galicia, mantivo onte unha xuntanza co ministro do Interior, Juan Ignacio Zoido, para abordar dous asuntos de grande interese para a Comunidade: retomar o número óptimo de policías nacionais na Unidade Adscrita e a necesidade dunha nova comisaría en Lugo.
O presidente da Xunta avaliou co ministro a opción de incrementar os efectivos da policía autonómica, de tal xeito que se aproximen novamente aos 500 efectivos dentro da Unidade de Policía Nacional Adscrita á comunidade.
Feijóo trasladou tamén ao ministro, a necesidade obxectiva dunha nova comisaría na cidade de Lugo así como a posibilidade de situala nas dependencias do antigo hospital.
Sobre este ultimo punto, Feijóo avanzou neste mes de febreiro unha reunión entre a Secretaria de Estado da Seguridade e o conselleiro de Facenda –responsable do Patrimonio da Comunidade- para facer unha avaliación e empezar cos proxectos construtivos.
Ante este anuncio, a alcaldesa de Lugo, Lara Méndez, dixo esta mañá que estará encantada de recibir os investimentos necesarios para rehabilitar a vella residencia, pero que queren que esas promesas do presidente da Xunta de Galicia, se materialicen.
A alcaldesa afirmou que desde o Concello seguirán con cautela os anuncios do presidente da Xunta para que deixen de ser anuncios e se convertan en realidade.
Lara Méndez prentende convocar unha mesa de traballo cos veciños do barrio da residencia para a rehabilitación do barrio e así poder trasladarlles as palabras do goberno galego e recordarlles que o goberno municipal si segue comprometido nas inversións para ese barrio. Ademáis, recorda que o Concello de Lugo xa actuou na zona e seguirá actuando para dar unha zona de esparcemento e que o barrio da Residencia “sexa o que xa foi, un barrio punteiro da cidade”.
Por outra banda, a agrupación local Lugonovo, insta a En Marea a levar ao Goberno Central unha iniciativa para que se faga efectivo o anuncio da nova comisaría para Lugo. Os edís e a edil de Lugonovo valoran con moito escepticismo o anuncio de Núñez Feijoo de poñer en marcha a nova comisaría no antigo Hospital Xeral.
Santiago Fernández Rocha, voceiro de Lugonovo, salientou esta mañá que “non hai máis que mirar os orzamentos autonómicos deste ano para comprobar a consideración que a Xunta ten con Lugo e, en concreto, co barrio da Residencia”
Fernández Rocha lembra asemade o compromiso do portavoz municipal do Partido Popular durante os últimos comicios locais, para desenvolver na zona un xardín e unha área de xogos infantís que “tamén quedou no tinteiro”.
