O Concello de Lugo vén de rematar as obras de renovación de 35 acometidas na avenida Marqués de Ombreiro da capital. Así o explicou o Goberno Local hoxe, día de finalización destas obras de substitución do fibrocemento que o executivo socialista puxo en marcha na zona logo das obras de pintado e arranxo da estrada feita durante o pasado ano polos nacionalistas, tamén no Goberno, e logo tamén das obras de realización do carril bici na zona, posto en marcha polos socialistas.
O que si, esta actuación permitiu renovar as acometidas da marxe dereita da víam substituíndo tubaxes de fibrocemento por outras de fundición, máis resistentes e duradeiras.
A rexedora explicou que “a través desta actuación modernizamos o servizo, mellorando a calidade da subministración”, nunha zona que tendía a sufrir rebentóns nas tubaxes de xeito habitual, quedando nalgunha ocasión ata unha fin de semana enteira sen suministro de auga.
Nestas obras, o Goberno local aposta por infraestruturas máis sostibles e eficientes, “en consonancia coa transformación que estamos a impulsar no municipio, para acadar unha cidade máis agradable e cómoda para os cidadáns”.
A intervención enmárcase dentro do plan municipal para erradicar a presenza de fibrocemento nas canalizacións da cidade. Un obxectivo para o que a área de Medio Ambiente consignou 1’2 millóns de euros e que suporá a actuación sobre 250 acometidas e 4.080 metros de tubaxes en 14 rúas da cidade concentrando, fundamentalmente, os esforzos nas contornas de Fingoi, Marina Española e a Cheda.
Os traballos inclúen, ademais da substitución das canalizacións, a renovación completa das beirarrúas, que suman 6.550 metros de pavimento, actuando, de forma integral, sobre estas vías.
