A subdelegada do Goberno en Lugo, Isabel Rodríguez, sinalou hoxe o impacto positivo do Ingreso Mínimo Vital (IMV) na protección económica dos lucenses, unha iniciativa social pioneira do Goberno de España que, desde a súa aprobación hai cinco anos, chegou na provincia a 5.996 fogares.
Isabel Rodríguez apuntou que o importe acumulado da prestación en Lugo é de 90.061.567,36 euros, cunha contía media mensual para as persoas beneficiarias de 515,50 euros e concretou nesta liña que actualmente perciben esta prestación un total de 16.707 persoas, das que 9.212 son mulleres (55,14%) e 7.494 homes (44,86%).
Rodríguez subliñou a importancia desta ferramenta clave no escudo social impulsado polo Goberno para reducir as desigualdades sociais e baixar as taxas de pobreza.. “Esta prestación é esencial para seguir reducindo a pobreza estrutural e atender especialmente as necesidades das familias con menores”. Subliñou.
A subdelegada incidiu no compromiso responsable do Goberno de España na implantación do Ingreso Mínimo Vital para avanzar no obxectivo irrenunciable de alcanzar novas conquistas de xustiza social.
