O Goberno Local vén de informar dos avances que están a ter lugar na obra de humanización da Ronda da Muralla, que se está a executar no treito entre as rúas Santiago e Vilalba. O Tenente de Alcalde da corporación lucense explicou que veñen de colocar o novo alumeado da zona que, dixo, “unha vez entre en funcionamento mellorará a percepción visual da Muralla”.
Nos últimos días instaláronse 9 novas luminarias LED tipo RGB, que permitirán adaptar a intensidade lumínica ás distintas horas e á luminosidade do día. O alumeado permitirá variar a luminosidade do monumento segundo a hora do día, mostrando luces de tonalidade cálida na noite e luz fría durante as mañás. “Ademais, continuamos a avanzar na implantación do alumeado LED cun baixo consumo enerxético, para reducir a factura da luz e as emisións contaminantes”, lembraron dende a área de Mobilidade.
A concellería que dirixe o Tenente de Alcalde agarda que durante esta semana recuperen a normalidade do tráfico da zona, ao estarse rematando xa os traballos de pavimentación do novo vial para os vehículos. O segundo edil lembrou que “nos vindeiros días reabrirase a circulación do tráfico neste treito, e a veciñanza poderá desfrutar dun novo treito da Ronda completamente renovado”.
