O PP destaca que a Xunta reserva inversións para Monforte por importe de case tres millóns de euros

As inversións recollidas no proxecto de orzamentos da Xunta para 2020 inclúen case tres millóns de euros para Monforte, destinados fundamentalmente a centros educativos, mellora de infraestruturas sanitarias, comunicacións, turismo e patrimonio cultural. Así o explicaron hoxe os populares da localidade, que destacaron que Lugo volve a ser a provincia con maior investimento per cápita de Galicia, e sitúase en 4.252 €/habitante, o que supón 230 euros máis que no 2019.

A voceira municipal do PP de Monforte, Katy Varela, destaca as inversións previstas en materia sanitaria. Así, pon de relevo a partida de 706.165 euros destinada a diversas melloras no hospital comarcal. Igualmente, está prevista a mellora e acondicionamento de centros de saúde, por importe de 60.000 euros.

Relevante é tamén a inversión programada en materia de educación, para a rehabilitación integral e funcional de centros educativos. Esta partida totaliza 850.000 euros, sinala Katy Varela, que resalta o esforzo que leva a cabo a Administración autonómica para a mellora de centros escolares. Para a sinalización do Camiño de Santiago, nas grandes contas da Xunta para 2020 figuran 232.627 euros e para iniciativas de protección do patrimonio cultural, 109.140 euros.

A mellora das comunicacións é outra fronte a que atenden os orzamentos da Xunta para o próximo exercicio en Monforte. Neste caso, as partidas previstas son as seguintes: reformas na estación de autobuses, 165.073 euros; acceso ao porto seco de Monforte, 750.000 euros, e, para un convenio coa Fundación de Ferrocarrís, 30.000 euros.

A voceira municipal do PP, Katy Varela, destaca que a estabilidade do goberno de Galicia fai posible sacar adiante os orzamentos, co que iso supón para que os cidadáns poidan ver cumpridas as súas expectativas en canto a servizos e infraestruturas, e, polo tanto, mellorada a súa calidade de vida.