O Goberno local decretou o peche temporal do after “Las Palmeras”establecemento situado na rúa Tui, no barrio da Milagrosa, tras a apertura dun expediente administrativo derivado de distintas actuacións e informes acumulados nos últimos meses. A decisión prodúcese despois dun período de mobilización veciñal e de iniciativas impulsadas polo Grupo Popular, que viñan reclamando medidas ante os problemas rexistrados na zona.
Segundo trasladaron representantes do PP, a clausura temporal confirma a necesidade de intervención municipal, aínda que consideran que “a medida resulta insuficiente e solicitan que se inicie o procedemento para a posible revogación da licenza”.
No barrio da Milagrosa recolléronse arredor de 1.500 sinaturas solicitando máis seguridade e medidas que garantan a convivencia e o descanso. Ao longo dos últimos meses producíronse comparecencias públicas, denuncias e peticións formais ante o Concello.
As queixas fan referencia a supostos incumprimentos reiterados relacionados co funcionamento do local, como cuestións de aforo e horarios, así como a episodios que afectarían ao descanso veciñal. Desde a oposición sosteñen que un peche de 47 días non resolve unha problemática que, segundo indican, se prolonga no tempo.
Cronoloxía das actuacións
Os feitos que motivaron o expediente estarían documentados con data do 29 de xuño de 2025, segundo a información achegada pola oposición. O Grupo Popular solicitou actuación inmediata o 7 de xullo e realizou novas comparecencias o 1 de setembro e o 1 de marzo, ademais de presentar as sinaturas veciñais o 12 de setembro. O expediente administrativo iniciouse o 28 de outubro.
Desde o PP tamén advertiron sobre a posible relevancia xurídica da agrupación de intervencións en dous expedientes distintos, ao considerar que podería influír na apreciación da reincidencia.
Marco legal
A normativa autonómica aplicable é a Lei de Espectáculos Públicos e Actividades Recreativas de Galicia. O artigo 36 contempla, para determinadas infraccións graves, sancións económicas que poden acadar os 30.000 euros e o peche temporal do establecemento por un período máximo dun ano. O artigo 37 establece que, á hora de graduar as sancións, deben valorarse factores como a reincidencia, a intencionalidade e a transcendencia social dos feitos.
Neste caso, a oposición considera que concorren elementos de reiteración e impacto social suficiente como para estudar medidas máis severas, mentres que o Goberno municipal defende que as actuacións se axustan ao procedemento legal e aos informes técnicos dispoñibles.
O PP subliña que “aquí falamos precisamente diso: reincidencia, reiteración no tempo e unha evidente transcendencia social nun barrio enteiro que se mobilizou para defender o seu dereito ao descanso”.
Non imos parar
Os populares reiteran “o noso compromiso coa Milagrosa é firme. Esiximos que se analice con rigor esta situación e que se adopten todas as medidas necesarias ata garantir o peche definitivo se así o permite a lei. Non é unha cuestión política. É unha obriga legal protexer a convivencia, a seguridade e o descanso dos veciños”.
