" />

O SLG pide a suspensión do Censo Agrario 2020 até rematar o estado de alarma

O Sindicato Labrego Galego vén de rexistrar un escrito dirixido ao Instituto Nacional de Estatística (INE) pedíndolle que se adíe a realización do Censo Agrario 2020 até que remate o estado de alarma por resultar imposible facelo nos quince días habilitados para tal fin, xa que “a súa complexidade obrigará a moitas persoas a ter que recorrer a asesores aos que, en moitos municipios confinados, non poderán acudir”.

Para o SLG, non existen motivos que xustifiquen a urxencia da recompilación destes datos. Ademais, e en vista de que “moita da información solicitada xa obra nos arquivos da administración”, debería abreviarse o formulario eliminando todas aquelas cuestións que requiran respostas que pode acadar o INE polos seus propios medios.

Nas últimas semanas, o INE estivo remitindo cartas a labregos e labregas cominándoos a cumprimentar o Censo Agrario 2020, algo que é obrigatorio e se ordena cun prazo improrrogable de quince días.

CenTrátase dun formulario dificultoso de cumprimentar, debido á súa extensión (12 páxinas) e á grande cantidade e especificidade dos datos solicitados. Segundo o sindicato, ao tratarse dun sector profesional cunha idade media moi avanzada, “a dificultade da cumprimentación do censo vai obrigar a que moitas persoas acudan a asesorías e organizacións agrarias na busca de apoio para realizar a tarefa”. En Galicia, “isto empeora” pola dispersión poboacional e as distancias entre os domicilios das persoas afectadas e as asesorías ás que deben acudir, ocasionándolles uns gastos e dificultades engadidos que se agravan pola pandemia do Covid-19.

“Cómpre pensar que a maioría das persoas activas en agricultura, por idade, inclúense nos grupos máis vulnerables en caso de contraer a enfermidade; e que os servizos de asesoramento aos que recorren poden estar na capital da comarca, á que non poderían acudir no caso dos peches perimetrais”, conclúen.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo