Un home tivo que ser excarcerado despois de dar varias voltas de campá co seu coche en Lugo, concretamente nunha rotonda situada no quilómetro 1 da LU-546, na parroquia de San Mamede dos Anxos.
Foi unha testemuña a que chamou ao 112 para informar do accidente, que ocorreu preto das 14.30 horas de onte. No operativo de rescate participaron Urxencias Sanitarias de Galicia-061, bombeiros de Lugo, axentes da Garda Civil e os servizos de mantemento da estrada.
Xa na escena do accidente, os bombeiros comprobaron que o conductor -que era o único ocupante do vehículo- era incapaz de saír polo seu propio pé, polo que procederon a liberalo con material de excarceración.
Unha vez fóra do vehículo, o conductor foi trasladado ao hospital en ambulancia.
