Os Cines Codex incorporan esta semana á súa carteleira dúas novas propostas cinematográficas de marcado carácter autoral. A partir deste venres poderán verse “As correntes”, da directora arxentina Milagros Mumenthaler, e “Omaha”, do realizador estadounidense Cole Webley.
“Omaha” (Estados Unidos, 2025, 83 minutos) narra a historia dos irmáns Ella e Charlie, que, tras unha traxedia familiar, emprenden unha viaxe por estrada xunto ao seu pai na procura de novos horizontes e experiencias. Ao longo do percorrido deberán afrontar situacións que poñerán á proba os seus vínculos familiares, mentres Ella comeza a descubrir que a realidade non sempre é o que parece. A película propón un emotivo relato sobre o crecemento persoal, o dó e a importancia dos lazos familiares.
Pola súa banda, “As correntes” (Arxentina, 2025, 104 minutos), dirixida por Milagros Mumenthaler, presenta a historia de Lina, unha recoñecida profesional da moda de 34 anos que, no momento álxido da súa carreira, protagoniza un inesperado xesto durante unha prestixiosa entrega de premios en Suíza. De regreso a Bos Aires, cala sobre o sucedido, pero a súa vida comeza a transformarse silenciosamente, facendo aflorar un pasado que pensaba definitivamente superado.
A película foi recoñecida co Premio TVE “Otra Mirada” no Festival Internacional de Cinema de San Sebastián 2025, un galardón que distingue obras cunha especial sensibilidade e capacidade para ofrecer novas perspectivas sobre a realidade.
As entradas para ambas as dúas películas xa están á venda e poden adquirirse tanto nas billeteiras dos Cines Codex como de forma anticipada a través da súa páxina web www.codexcinemas.com
Os Cines Codex continúan así coa súa aposta por unha programación de cinema independente, europeo e de autor, ofrecendo ao público lucense unha selección de filmes recoñecidos nos principais festivais internacionais e achegando á cidade algunhas das propostas máis destacadas da actualidade cinematográfica.
