Os socialistas de Pantón esixen que se  cubra unha praza de médico

Os Socialistas de Pantón esixen ao Concello e á Consellería de Sanidade que cumpra co seu compromiso de cubrir a praza do terceiro médico, e brindar así un servizo de calidade aos veciños e veciñas de Pantón. Advirten de que, tanto o Alcalde, como a Xunta “seguen sen facer absolutamente nada para cubrir a praza do terceiro médico, que se atopa vacante desde o 2021”.

Dende o PSdeG de Pantón “levamos moito tempo denunciando este compromiso incumprido do Alcalde e do PP co noso concello, e seguindo tamén este asunto como fonda preocupación”. Lembremos que se comprometeron tanto pola Alcaldía como pola Xunta de Galicia a cubrir esta praza no mes de xaneiro de 2022, “pero novamente fixeron caso omiso ás peticións da veciñanza, xa que comprobamos que seguimos sen contar con este servizo vital para o noso pobo”.

Ao longo de todo o 2022 esta praza non se cubriu, creando un gran malestar entre os usuarios e usuarias de Pantón. “E moitas veces, tanto por baixas como por vacacións, o centro de saúde quedou ao longo do ano cun só médico, que é insuficiente para atender a toda a poboación, incluíndo urxencias e servizos a domicilio”.

É importante sinalar que Pantón conta cunha poboación de 2.428 habitantes, e os maiores de 65 anos son máis do 47,4% do censo, “que é o arco de idade que conta con máis patoloxías e polo tanto, que require máis atención sanitaria”. “

Finalmente lembran que o Grupo Parlamentario Socialista defendeu iniciativas para mellorar esta situación, o pasado 28 de marzo de 2022, no Parlamento de Galicia. “Unha vez máis, o PP mirou cara outro lado, abandonando á veciñanza de Pantón”.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo

WP Twitter Auto Publish Powered By : XYZScripts.com