A Asociación de Veciños, Comerciantes e Industrias da Milagrosa remitiu esta mañá un escrito ao Conselleiro de Sanidade da Xunta reclamando unha inversión maior da prevista nos orzamentos do 2024 para a reforma do centro de saúde do barrio.
Nos presupostos da Xunta de Galicia para Lugo en 2024, a Consellería de Sanidade prevía unha inversión de 700.000 euros para as obras de dito centro de saúde, pero dende a agrupación veciñal da Milagrosa declaran que esta cantidade “parécenos totalmente insatisfactoria e insuficiente”. Segundo a asociación, o orzamento estimado para a reforma integral do centro é de 2,5 millóns de euros, polo que cunha inversión de 700.00 euros sería necesario agardar arredor de cinco anos anos para que as obras estiveran finalizadas.
A asociación considera que esta situación é insostible no barrio máis poboado da cidade de Lugo, posto que na Milagrosa “predomina a xente maior” e para que todos os veciños poidan acudir ao médico precisan desplazarse varios quilómetros.
Tamén comparan a súa situación coa do centro de saúde do barrio do Sagrado Corazón plantexándolle varias dúbidas ao conselleiro. “Estima o Señor Conselleiro que os veciños da Milagrosa somos uns cidadáns de segunda? Cre o Señor Conselleiro que os veciños da Milagrosa non temos os mesmos dereitos que os demais veciños da cidade? Cre o Señor Conselleiro que é xusto e prudente que o barrio coa cuarta parte da poboación de Lugo espere catro ou cinco anos para unha reforma do seu Centro de Saúde?”