Malia que a tendencia víñao avisando e que é normal un aumento dos positivos detectados de cara á fin de semana, o certo e que a suba do ritmo de contaxios nas últimas horas é moi importante, máis do que, quizáis cabería esperar.
Con todo, non todos os datos son malos hoxe. Se ben é certo que os casos non descenderon como viñan facendo nas últimas xornadas, tamén o é que non subiron en exceso, e máis ben pode falarse dunha estabilidade.
En cifras, e segundo o último informe do SERGAS con datos recabados ata as 6 da tarde de onte, os casos activos na provincia sitúanse en 177, 2 máis que na xornada anterior.
Este freo no descenso, vén dado pola gran cantidade de positivos detectados nas últimas horas e que o SERGAS cifrou en 17, moi por riba dos 7 positivos que se detectaron nas dúas xornadas anteriores. Hai que ter en conta tamén o descenso das altas médicas e que xa son 12.670 as persoas curadas dende o inicio da pandemia, 16 delas no día de onte.
Pero, a boa nova da xornada é o alivio considerable da presión hospitalaria. Se a pasada fin de semana os hospitais comarcais quedaban libres de casos covid, hoxe é o HULA o que libera parte das súas camas dedicadas ás enfermidades infecciosas. Así, nestes intres o HULA rexistra tan só 2 persoas en unidades convencionais de hospitalización e 1 persoa na UCI.
Estes datos, en apariencia bós, deixan na capital unha incidencia acumulada de 84 casos por cada cen mil habitantes a 14 días, e 51 a sete días, o que implica, segundo Sanidade, que as cifras aínda aumentarían. Sitúase así Lugo na cabeza das cidades galegas en canto á maior incidencia do virus algo que preocupa a Sanidade; en especial, tendo en conta que hoxe da comezo unha das festas con máis visitantes da capital: o Arde Lucus.
