Un home duns sesenta anos faleceu onte tras producirse unha colisión frontal entre dous turismos na N-640, entre o Polígono Industrial e o centro urbano de Chantada. Ademais, no accidente resultou ferida outra persoa, a ocupante do outro vehículo implicado, que foi evacuada ao centro hospitalario.
Segundo a información facilitada polo 112 Galicia, o sinistro rexistrouse ás 21:30 da tarde, cando os dous coches bateron de fronte e a vítima mortal quedou atrapada.
Ademais dos efectivos do Servizo de Prevención, Extinción de Incendios e Salvamento de Chantada, ao lugar do accidente acudiron os servizos sanitarios de urxencia, que só puideron confirmar o falecemento do home e trasladaron á ocupante do outro turismo para sometela a un recoñecemento médico.
