Os edís de Vilalba Aberta, Modesto Renda e Mª Xosé Fernández, anunciaron na tarde de onte o inicio dunha campaña en contra da supresión das ensinanzas de adultos anunciadas pola Xunta no IES Lois Peña Novo.
A formación municipalista toma así a iniciativa política diante do que cualifican de “inaceptable órdago da Xunta de Galicia aos intereses da veciñanza de Vilalba, facendo seu o malestar do claustro coa decisión da Consellería de Cultura, Educación, Formación Profesional e Universidades de suprimir tanto a Esa (Educación Secundaria para Adultos)”.
Tanto no escrito a presentar diante da Xunta como na iniciativa a Pleno, Vilalba Aberta volverá reclamar “a implantación en Vilalba de dous novos ciclos formativos de FP, isto é; o curso FP de Explotacións Agrarias Extensivas e o de Procesos e calidade na industria alimentaria”.
“A nosa reivindicación parte da imperante necesidade de facer competitiva a estrutura produtiva do Concello, ao tempo que se melloran ás condicións de emprego e dun segmento de poboación, a mocidade, líder involuntario de todas as clasificacións de datos de paro e para o que Formación Profesional se concibe coma unha ferramenta imprescindible”, explicaron