" />

Xuventude organiza un taller para formar á mocidade sobre a seguridade viaria en vehículos de mobilidade persoal

Segundo datos da Asociación de Usuarios de Vehículos de Movilidad Persoal (AUVMP), actualmente en España atópanse en circulación máis de 20.000 vehículos deste tipo, a maioría patinetes eléctricos, que non dispoñen dun espazo propio para circular e, por tanto, conviven na vía pública co resto de usuarios e tipos de transporte xerando situacións de risco.

Unha realidade que a área de Xuventude tivo moi en conta para organizar, este semestre, unha nova actividade formativa dirixida á mocidade lucense e encamiñada a mellorar os coñecementos que a rapazada ten sobre seguridade viaria.

Trátase dun taller teórico-práctico, motivado no auxe que está a ter o emprego destes vehículos, tales como patinetes eléctricos ou hoverboards e que ten como obxectivo dar a coñecer e comprender, entre os seus condutores e condutoras, a normativa e os principios básicos de protección activa e pasiva así como potenciar as habilidades e destrezas a bordo dos mesmos para poder circular adecuadamente por estradas abertas ao tráfico, compartindo o seu uso con outros usuarios e garantindo, á súa vez, a convivencia.

O obradoiro, que terá lugar o martes, 21 de abril, na Casa da Xuventude, a partir das 17:00 horas, conta con 20 prazas dispoñibles e ten unha duración de 4 horas, dúas de teoría e outras dúas de práctica.

Na primeira parte exporanse as normas e sinais de circulación, especialmente as que afectan a este tipo de vehículos aínda que tamén inclúe unha explicación de nocións básicas sobre a seguridade dos mesmos: equipamento, iluminación, timbre, etc.

O segundo bloque, baseado no seu manexo, desenvolverase nas inmediacións do recinto da Casa da Xuventude sobre circuíto pechado. Nel abordarase o equilibrio con cambios de pesos movendo o corpo, a freada controlada, o cambio de dirección, esquive de obstáculos, posición na calzada correcta e segura, prioridade, ou non, con respecto a outros usuarios e vehículos da vía, velocidade e distancia de seguridade, cambios de dirección e sinalización, uso adecuado dos pasos para peóns e ciclistas, circulación en paralelo e en grupo, interseccións e glorietas, entre outros.

Todos os mozos e mozas interesados en participar nesta actividade gratuíta poden inscribirse na Casa da Xuventude, na rúa Xesús Bal e Gay.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo