A Sección Civil e de Instrución do Tribunal de Instancia de Viveiro, praza 1, ordena reabrir a causa sobre as imaxes subidas a páxinas web de contido erótico de mulleres gravadas ouriñando na vía pública durante a festa da Maruxaina celebrada en agosto de 2019 en Cervo.
A xuíza instrutora aplica, desta forma, a recente interpretación xurisprudencial do Tribunal Supremo sobre o cómputo de prazos na Lei de Axuizamento Criminal, a cal permite a práctica de dilixencias nos doce meses seguintes á identificación dun novo investigado.
A sentenza do Tribunal Supremo referente ao devandito cómputo foi ditada no tempo transcorrido entre o auto de sobresemento provisional do caso, de data 14 de xaneiro de 2026, e o momento en que se ordena reabrir o procedemento.
O Tribunal de Instancia de Viveiro, tras analizar a ausencia de indicios de criminalidade contra o único investigado ata o momento, acorda a firmeza do sobresemento respecto a el, pero ordena reabrir a causa co obxectivo de investigar a outra persoa identificada a partir dun informe técnico.
En consecuencia, decreta a práctica de diversas dilixencias para esclarecer a participación do novo investigado nos feitos e require ás partes que propoñan as dilixencias adicionais que consideren necesarias. A resolución non é firme, pois contra ela cabe interpoñer recurso de apelación.
Fotografía: Concello de Cervo.
