O Goberno local anunciou a instalación de seis novos puntos de recarga eléctrica en Lugo, catro destinados a vehículos eléctricos e dous para bicicletas e vehículos de mobilidade persoal, como patinetes. A actuación forma parte do Plan de Sostibilidade Turística en Destino, financiado con fondos Next Generation da Unión Europea, e busca fomentar unha mobilidade máis sostible na cidade.
O concelleiro de Mobilidade, Antonio Ameijide, destacou que Lugo non conta actualmente con puntos públicos de recarga en vía pública, a diferenza doutras cidades que xa levan anos adaptándose á nova mobilidade eléctrica. Ademais, sinalou que esta era unha demanda existente tanto entre particulares como entre empresas e profesionais do transporte.
Pola súa banda, a concelleira Cristina Sanz subliñou a importancia de aproveitar os fondos europeos para executar proxectos útiles e mellorar os servizos da cidade con infraestruturas prácticas para a cidadanía.
O Concello licita dous contratos para instalar as catro estacións de recarga e executar as obras necesarias, cun investimento de 66.500 euros. Os puntos estarán situados no parque de Frigsa, no aparcadoiro do complexo deportivo Palomar e nas paradas de taxi de Ramón Ferreiro e da Fonte dos Ranchos. Dous destes puntos estarán precisamente destinados a facilitar a carga dos taxis eléctricos, respondendo ás peticións do propio colectivo.
Ademais, o Goberno local instalará dous puntos de recarga para bicicletas e patinetes eléctricos, cun investimento próximo aos 18.000 euros. As localizacións concretas destes últimos decidiranse nas próximas semanas.
O Executivo municipal avanzou tamén que xa prepara unha futura ampliación da rede de recarga eléctrica por diferentes zonas da cidade para dar resposta ao incremento da demanda deste servizo.
