O novo filme de Pietro Marcello reivindica a figura dunha das grandes lendas do teatro europeo
Os Cines Codex estrean o próximo 12 de xuño Eleonora Duse, a divina, a nova película do recoñecido cineasta italiano Pietro Marcello (Martin Eden), unha intensa e elegante aproximación á vida da actriz que revolucionou a interpretación teatral moderna.
Protagonizada por Valeria Bruni Tedeschi e coa participación de Noémie Merlant, a película sitúanos na Italia de posguerra, cando Eleonora Duse, afastada dos escenarios durante anos, sente a necesidade irrefreable de regresar ao teatro, o único lugar onde realmente se sentiu libre. Entre os conflitos familiares, o paso do tempo e os recordos da súa relación co poeta Gabriele D’Annunzio, a actriz emprende unha última batalla pola arte, a dignidade e a liberdade creativa.
Presentada en destacados festivais internacionais e avalada pola crítica, Eleonora Duse, a divina constitúe un singular retrato dunha muller adiantada ao seu tempo, ao mesmo tempo que reflexiona sobre a relación entre a creación artística, o poder e os cambios históricos que marcaron a Europa do século XX.
Coa súa habitual mestura de lirismo, memoria e recreación histórica, Pietro Marcello ofrece unha obra visualmente poderosa que rende homenaxe a unha das figuras máis fascinantes da escena europea.
Eleonora Duse, a divina poderá verse nos Cines Codex a partir do 12 de xuño.
