O conselleiro de Cultura, Lingua e Xuventude, José López Campos, xunto Rosa Crujeiras, reitora da Universidade de Santiago, a alcadesa de Lugo, Elena Candia, xunto con outras personalidades, inauguraron este mércores a Cátedra de Xestión Cultural Especializada en Patrimonio.
Campos cualificou a posta en marcha desta cátedra como “un fito histórico”, ao considerar que sitúa a Galicia entre os territorios pioneiros na formación e investigación especializada en patrimonio cultural.
A vicerreitora de Cultura da USC, Ana Cabana, quen interviu no acto, reivindicou o papel transformador da universidade, asegurou que a universidade debe ser contracultural; á cultura maioritaria xa se accede por outras vías, nunha defensa da capacidade da institución académica para fomentar o pensamento crítico e impulsar novas formas de coñecemento.
Candia puxo en valor a colaboración entre a Universidade, as administracións públicas e o tecido social como un elemento clave para impulsar proxectos que contribúan ao desenvolvemento cultural da cidade e á protección do seu patrimonio.
A alcaldesa trasladou a felicitación ao equipo promotor da cátedra e expresou a disposición do Concello a colaborar nas actividades que se desenvolvan ao abeiro desta iniciativa. Así mesmo, sinalou que a creación desta cátedra supón tamén un recoñecemento ao labor da Facultade de Humanidades do Campus de Lugo, destacando a súa oferta formativa, integrada polo Grao en Xestión Cultural, o Máster en Servizos Culturais e o programa de doutoramento en Estudos Culturais.
