Os cines Codex estrean este venres dúas novas películas que amplían a oferta da súa carteleira: a produción francesa Os músicos, dirixida por Grégory Magne, e a española 9 lúas, da cineasta Patricia Ortega.
Os músicos é unha comedia dramática ambientada no universo da música clásica. O filme conta a historia de Astrid, unha muller que logra cumprir o soño do seu pai ao reunir catro instrumentos Stradivarius para un concerto único. Porén, a relación entre os catro intérpretes elixidos para a actuación vese marcada polo choque de personalidades e os conflitos entre eles, poñendo en risco a celebración dun evento agardado polos afeccionados á música de todo o mundo.
Pola súa parte, 9 lúas propón un drama centrado na identidade e na toma de decisións. O protagonista é Ángel, un home trans que, cando está a piques de completar a súa transición e comezar unha nova etapa profesional, recibe unha inesperada noticia: está embarazado. A situación obrígao a enfrontarse a un conflito persoal que cuestiona os seus plans de futuro e a súa maneira de entender a masculinidade.
Con estas dúas estreas, os cines Codex ofrecen ao público lucense unha combinación de cinema europeo contemporáneo con propostas que transitan entre a comedia, o drama e a reflexión social.
