Un operario resultou ferido este venres tras sufrir unha caída mentres traballaba nunha obra situada no lugar de Eiriz, no municipio de Folgoso do Courel.
O accidente laboral produciuse poucos minutos despois das 14.30 horas. Segundo informou o 112 Galicia, un particular alertou á central de emerxencias de que un traballador caera no transcurso das tarefas que estaba a realizar.
De acordo coa información facilitada, o operario atopábase traballando nun piso cando cederon as táboas de madeira do chan, o que provocou que precipitase ao nivel inferior do inmoble. Como consecuencia da caída, o traballador resultou ferido e precisou asistencia sanitaria.
Tras recibir o aviso, o Centro Integrado de Atención ás Emerxencias mobilizou un operativo no que participaron efectivos de Urxencias Sanitarias de Galicia-061 e da Garda Civil. Unha vez atendido no lugar, o ferido foi evacuado ao Hospital de Monforte para recibir atención médica.
