A Festa do Percebe de Rinlo celebrarase o vindeiro 1 de agosto e volverá contar co Percebus, o servizo gratuíto de transporte posto en marcha polo Concello de Ribadeo para facilitar os desprazamentos e reforzar a seguridade durante a xornada. Como principal novidade desta edición, incrementarase o servizo nocturno, pasando de dous a tres autobuses entre as 21:00 e a 1:00 da madrugada, debido á elevada demanda rexistrada nos últimos anos. Pola mañá, o Percebus funcionará de maneira continuada entre as 12:00 e as 15:00 horas, conectando a estación de autobuses de Ribadeo con Rinlo.
O alcalde de Ribadeo, Dani Vega, destacou que esta festa ten como obxectivo principal poñer en valor o percebe como produto de alta calidade e símbolo da riqueza mariñeira da costa ribadense, así como recoñecer o labor diario das percebeiras e percebeiros. O rexedor agradeceu a implicación da agrupación de profesionais do sector, da confraría de pescadores, da Xunta de Galicia, que financia o evento, e de todas as persoas que colaboran na organización.
Vega lembrou que esta celebración naceu hai anos por iniciativa dun grupo de percebeiras co propósito de dar visibilidade ao seu traballo e ao mundo do mar, converténdose co paso do tempo nunha cita consolidada que tamén serve para promocionar a gastronomía e a identidade mariñeira de Rinlo.
O alcalde puxo en valor a importancia de seguir apoiando esta vila costeira, destacando o seu carácter mariñeiro e o compromiso do Concello coa organización de actividades e cos investimentos destinados a mellorar o lugar. Ademais, incidiu en que a coordinación entre administracións e organización é fundamental para garantir o éxito da festa, facendo especial fincapé nas medidas de seguridade, entre elas o reforzo do transporte público gratuíto.
Finalmente, Dani Vega reiterou o seu agradecemento ás percebeiras e percebeiros polo esforzo que realizan ao longo de todo o ano, tanto na extracción dun produto de gran calidade como na defensa e continuidade do oficio, contribuíndo ao relevo xeracional e á preservación da tradición mariñeira de Rinlo
