Rosa María Rivas foi nomeada nova xefa da Unidade de Violencia contra a Muller da Subdelegación do Goberno en Lugo, segundo a resolución publicada no Boletín Oficial do Estado. Substitúe no cargo a María Luisa Castro.
A unidade encárgase de coordinar na provincia as actuacións das forzas e corpos de seguridade do Estado, a Administración de Xustiza e o resto das administracións públicas en materia de violencia de xénero, especialmente no relativo á protección e ao seguimento das vítimas.
A subdelegada do Goberno en Lugo, Olimpia López, recibiu a nova responsable e destacou a importancia e a responsabilidade asociadas ao posto. López valorou a formación de Rivas en igualdade, o seu coñecemento da provincia e a experiencia acumulada na Administración estatal.
Natural de Lugo, Rosa María Rivas é funcionaria da Administración do Estado desde 2006 e traballa na Subdelegación do Goberno desde 2012. Nos últimos anos exerceu como xefa da Sección de Estranxeiría.
A súa formación inclúe diversos cursos impartidos polos ministerios de Política Territorial e de Igualdade sobre violencia de xénero, igualdade de oportunidades e emprego non sexista da linguaxe, entre outras materias.
