Os dispositivos integraranse na Rede Dixital de Emerxencias e Seguridade de Galicia. O Consorcio Provincial tamén iniciou unha formación para o seu persoal e mantén aberto o proceso para cubrir 37 prazas de bombeiro-condutor.
A Deputación de Lugo distribuirá 72 novas emisoras portátiles de radiocomunicación dixital entre os parques de bombeiros de Barreiros, Vilalba, Sarria, Monforte de Lemos, Viveiro e Chantada. Técnicos provinciais recolleron os equipos este luns na Estrada.
Os terminais empregan tecnoloxía TETRA e están integrados na Rede Dixital de Emerxencias e Seguridade de Galicia (RESGAL), á que o Consorcio Provincial se incorporou en 2016. Segundo a Deputación, os aparellos permitirán renovar os dispositivos utilizados nas intervencións, mellorar a coordinación entre os efectivos e crear grupos de comunicación específicos para cada operativo.
A institución provincial sinala que levaba anos solicitando esta renovación no marco do acordo asinado coa Axencia Galega de Emerxencias (AXEGA).
Formación para a apertura de portas
A incorporación das novas emisoras coincide co inicio dunha acción formativa sobre apertura de portas en edificios e vehículos. O curso está dirixido a todo o cadro de persoal do Consorcio, con independencia da súa categoría profesional.
A formación, impartida pola empresa Fuego y Mar, terá unha duración de sete horas e desenvolverase en Santiago de Compostela durante varias xornadas de setembro e outubro. O programa combina contidos teóricos con exercicios prácticos sobre métodos de apertura non destrutivos e forzados, así como intervencións en diferentes tipos de portas mediante ferramentas específicas.
Proceso para incorporar 37 bombeiros-condutores
A Deputación mantén aberto, ademais, o proceso selectivo para cubrir 37 prazas de bombeiro-condutor e reforzar os servizos dos seis parques comarcais.
Segundo os datos facilitados pola institución, 233 persoas participaron no primeiro exercicio da oposición e 166 superaron a proba, arredor do 71 %. O cadro de persoal do Consorcio Provincial conta actualmente con 120 prazas.
