A Xunta de Goberno Local de Lugo aprobou este luns un paquete de medidas centradas na atención social, o acceso á vivenda, a conservación das infraestruturas e o funcionamento dos servizos municipais. Entre os principais acordos figuran a ampliación do Servizo de Axuda no Fogar (SAF), unha nova convocatoria de axudas ao alugueiro por valor de 200.000 euros e a contratación de traballos de mantemento da rede viaria rural por 600.000 euros.
Máis horas de atención á dependencia
A modificación do contrato do Servizo de Axuda no Fogar, adxudicado a Aralia Servicios Sociosanitarios, permitirá ampliar nun 20 % a prestación e incorporar 3.138 horas adicionais, cun importe de 2,23 millóns de euros distribuídos entre 2026 e 2029.
O servizo atende actualmente 455 persoas e a lista de espera situábase en 538 o pasado 20 de outubro, 47 menos que en xuño. O obxectivo é atender todas as persoas agardando con grao III de dependencia e practicamente todas as de grao II.
A ampliación está vinculada ao incremento da achega autonómica subvencionable, que pasa de 12 a 16 euros por hora en 2026, con efectos retroactivos desde xaneiro. A previsión é que alcance os 17 euros en 2027 e os 18 en 2028.
Axudas ao alugueiro e novas vivendas
A Xunta de Goberno aprobou unha convocatoria de axudas ao alugueiro cun orzamento de 200.000 euros. Unha das principais novidades é o aumento de 400 a 550 euros do límite mensual da renda subvencionable, co propósito de adaptar o programa á evolución dos prezos da vivenda.
As axudas cubrirán entre o 20 % e o 50 % do alugueiro, en función dos ingresos e das circunstancias familiares e de convivencia. A convocatoria terá efectos retroactivos desde o 1 de xaneiro de 2026 e abranguerá os exercicios 2026 e 2027, cunha duración máxima de 24 meses. As persoas solicitantes deberán cumprir os requisitos económicos, sociais e de empadroamento establecidos nas bases.
No ámbito urbanístico, concedéronse dúas licenzas para construír 42 vivendas. Un dos proxectos sitúase na avenida da Coruña, esquina co Camiño de Pipín, e contempla 38 vivendas, dous locais comerciais e 99 prazas de aparcadoiro. O segundo, na rúa Florentino López Cuevillas, prevé catro vivendas tipo dúplex. Os orzamentos de execución, incluída a urbanización no primeiro caso, superan en conxunto os tres millóns de euros.
Mantemento das vías rurais e dos edificios
A contratación dos traballos de conservación das vías públicas municipais da zona rural contará cun orzamento de 600.000 euros, dividido en dous lotes: un de 278.134,11 euros para parroquias do norte e leste, e outro de 321.865,89 euros para as zonas sur e oeste.
Tamén se aprobou iniciar a contratación do servizo de mantemento, conservación e reparación dos edificios municipais, cun orzamento de licitación de 200.000 euros para un ano.
Cultura, cooperación europea e persoal
Entre os restantes acordos figuran as bases das subvencións para asociacións culturais e entidades privadas sen ánimo de lucro que organicen actividades culturais gratuítas no municipio durante 2026. A convocatoria contará con 15.000 euros e resolverase mediante concorrencia competitiva.
O Concello tamén solicitará á Comisión Europea financiamento para garantir a continuidade de Europe Direct Lugo en 2027. O proxecto prevé un orzamento de 75.000 euros, dos que 40.000 procederían da Comisión Europea e 35.000 da administración municipal.
Por último, aprobouse o nomeamento de tres policías locais e catro auxiliares administrativos como funcionarios de carreira, tras superar os respectivos procesos selectivos e os requisitos de formación e prácticas correspondentes.
