O Grupo Operativo Nocturno da Policía Local de Lugo intensificou nesta ponte de todos os santos os controis de alcol e drogas, detectando varias infraccións serias de tráfico por consumo de alcol.
Un dos controis estableceuse na rúa Julia Minguillón, onde detectaron a condución irregular dun vehículo. O condutor, que presentaba signos de embriaguez, foi requerido para unha proba de alcolemia, pero este negouse. A pesar de que os axentes lle informaron que se continuaba negándose estaría incurrindo nun delito, o condutor persistiu na súa conduta, polo que se lle instruíu un delito contra a seguridade viaria e inmobilizouse o seu vehículo.
Na Rúa Xenebro e na rúa Lamas de Prado detectáronse dous vehículos cuxos condutores foron sometidos ás probas de alcolemia, lanzando un resultado positivo de 0,62 e 0,65 mg/l respectivamente. Os axentes abriron dous expediente sancionadores con multas de 1.000 euros e a retirada de 6 puntos do permiso de condución para cada un deles, ademais de inmobilizar o seus vehículos.
Tamén interviu a Policía Nacional nestes operativos, dando o alto a un condutor que presentaba evidentes signos de embriaguez na rúa Curros Enríquez. Despois de sometelo ás probas de alcolemia, deu un resultado positivo de 0,86 mg/l, polo que se lle instruíron dilixencias por delito contra a seguridade viaria na modalidade de xuízo rápido.
