A Policía Local levantou na noite do sábado ao domingo, ata 19 actas de denuncia por infraccións á Lei de Residuos de Galicia, tras sorprender aos mozos ouriñando na vía pública en distintas rúas e prazas do casco histórico, mentres realizaban un dispositivo especial para combater condutas incívicas, propoñendo sanción para cada un deles de ata 900 euros.
Destes 19 mozos denunciados, 15 eran homes e 4 mulleres e as idades oscilan entre 20 anos, o máis novo e 37 anos a persoa de máis idade denunciada por estes actos incívicos.
Os lugares onde foron sorprendidas estas persoas foron, principalmente, a praciña da Universidade, a praza Pío XII, Clérigos, rúa Deán Fernández Varela (todas elas na contorna da Catedral) e na Travesía do Miño, nas inmediacións da fonte da Porta do Carmen.
Así mesmo foi denunciado un mozo de 28 anos por lanzar un vaso de cristal fronte á Catedral, rompéndose e quedando os cristais esparexidos polo chan, levantándose acta por infracción á Lei de Residuos de Galicia, propoñéndose sanción de ata 900 euros.
