A cidade de Lugo conta con poucos selos na historia de Correos. A Catedral, a Praza do Campo e, máis recentemente, a Muralla son as iconas que máis frecuentemente figuraron nas escasas tiradas de selos dedicadas a Lugo. Isto cambiará ao longo do ano 2021, xa que a Sociedade Filatélica Lucense logrou un compromiso de edición de selos para este exercicio en que a nosa cidade e a súa vinculación co Camiño Primitivo de Santiago protagonizarán varias tiradas. E non só iso, senón que os lucenses poden participar na creación deses selos, achegando imaxes que poderán figurar nos mesmos.
Para iso, a Sociedade Filatélica Lucense poderá remitir a Correos unha serie de imaxes para que as teñan en conta para as devanditas emisións, que abarcarán tanto selos ordinarios como ATM (selos de adhesivo de máquinas automáticas) e mesmo unha tarxeta enteiro postal (achéganse imaxes de exemplo de selos ATM e dalgúns selos dedicados a Lugo nas pasadas décadas).
Condicións para participar:
Poderá participar calquera interesado con independencia da súa filiación, condición persoal e mesmo idade, aínda que os menores e persoas sen capacidade de obrar deberán facer a remisión das imaxes con consentimento dos seus pais ou titores.
NON hai premios de ningunha clase para os participantes, xa que se trata dunha colaboración desinteresada da Sociedade Filatélica Lucense con Correos e cremos que o pracer de ver unha imaxe remitida desde a nosa cidade nun selo é en si mesmo unha recompensa.
O tema das fotografías serán edificios ou elementos de Lugo relacionados cos Patrimonios da Humanidade ou co Camiño Primitivo de Santiago.
As imaxes terán que ter a mellor calidade posible tanto nos enfoques como a nitidez dos elementos fotografados e a maior resolución posible.
Non se aceptarán imaxes manifestamente retocadas. Pódense realizar axustes de contrastre, brillo e demais pero para introducir correccións menores.
As fotografías remitiranse por calquera medio dixital ao noso correo electrónico: sociedadfilatelicalucense@gmail.com (pódense utilizar plataformas de envío como WeTransfer ou similar para arquivos de moito peso).
