A Praza de Riazón acolleu este mércores o acto de presentación da X Subida a Taboada, que se celebrará os días 4 e 5 de novembro, e que volve ao calendario automobilístico galego despois de dezasete anos sen disputarse grazas á iniciativa da área de Deportes e Medio Rural do Concello de Taboada e da Escudería Taboada.
Antes do peche do prazo -que se produciu onte á noite-, a organización confirmou a inscrición de medio cento de pilotos. A proba terá un trazado semellante ao da última edición, celebrada en 2006, cun percorrido pola estrada LU-611, entre Rubián e Taboada. As dúas primeiras mangas disputaranse na tarde do sábado, con saídas ás 15.30 e 17.30 horas, e o domingo á mañá as dúas últimas, ás 11.00 e 13.00 horas. O parque pechado e as verificacións técnicas realizaranse na contorna da Praza de Riazón e na Avenida de Lugo.
Na súa participación no acto, o concelleiro de Deportes e Medio Rural de Taboada, Manuel Diéguez, explicou que “recuperamos a proba co mesmo espíritu e ilusión que a caracterizou no seu momento, e co obxectivo de que perdure nos vindeiros anos e volva ser un referente do deporte na comarca e repercuta de forma positiva na economía local”.
A Subida a Taboada será a última proba do Campionato Galego de Montaña, a segunda na provincia, despois da Subida á Pontenova.
