A Xunta de Persoal do Distrito Sanitario da Mariña convoca unha concentración o vindeiro xoves 16 de novembro ás 11:30 horas na entrada principal do Hospital Público da Mariña para todas as categorías profesionais polas melloras laborais dos profesionais, demandando unha serie de medidas xerais e outras específicas para A Mariña.
As medidas que solicitan para os traballadores da Mariña son a mellora na dotación de material de traballo nas plantas de hospitalización (que consideran “insuficiente e obsoleto”); o dereito a roupa e calzado de traballo suficiente; o dereito a taquillas; o dereito a servizo de lavandería para todos; a mellora do cociente persoal-doente; non pechar camas no verán; as carteleiras axustadas desde xaneiro á xornada anual esixible; e melloras na contratación temporal.
En canto ás medidas xerais, reclamarán a recuperación do 100% da paga extra; a recuperación dos 3 lds perdidos; a carreira profesional co grao correspondente ao tempo traballado; a reclasificación de grupo profesional para todas as categorías; a exención de noites a partir dos 55 anos sen perda retributiva; a xubilación anticipada aos 60 anos; o recoñecemento do solape de xornada; e a equiparación da xornada complementaria por categoría non por destino.
