A Xunta licita as obras da senda que unirá o parque empresarial de Friol co núcleo urbano

A Consellería de Infraestruturas e Mobilidade publica hoxe na plataforma de contratación da Xunta a licitación das obras da senda peonil e ciclista de Friol, que conectará o parque empresarial co núcleo urbano da localidade.

O delegado territorial da Xunta en Lugo, José Manuel Balseiro, explicou que o orzamento de licitación ascende a 268.600 euros e as empresas interesadas teñen de prazo ata o 22 de abril para presentar as súas ofertas. A plataforma pública de contratos informa sobre o proceso e pon a disposición dos interesados toda a documentación necesaria.

Unha vez que se contraten os traballos, o prazo máximo de execución será de seis meses. A senda discorrerá pola marxe do polígono industrial ata enlazar coas beirarrúas da área urbana, entre os puntos quilométricos 18,300 e 18,870 da estrada autonómica LU-232.

A nova vía peonil terá unha lonxitude de 570 metros e unha anchura de dous metros, se ben será preciso ampliar a sección transversal da estrada en case 5 metros para construír a maiores unha cuneta de seguridade, unha pequena zona verde, e outra cuneta exterior con arquetas e tubaxe para a recollida das augas de escorrentía.

Esta actuación da Axencia Galega de Infraestruturas forma parte do Plan de Sendas de Galicia, que pretende promover unha mobilidade máis sustentable favorecendo modos de desprazamento menos contaminantes e alternativos á utilización do vehículo particular.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo