Animalistas piden unha liña de axudas para a loita contra a rata-toupa na Montaña

A Asociación Animalista Libera! amosou hoxe a súa preocupación pola posible adopción de medidas letais para tratar de controlar a poboación de roedores que estaría interactuando con cultivos en diferentes municipios da Montaña como Triacastela e Taboada e, avanzou a necesidade de que os poderes públicos traballen con accións previsoras e non de reacción ás problemáticas da Galicia vaciada.

Os animalistas propoñen unha convocatoria de axudas urxentes para os agricultores afectados, cuxas plantacións estarían danadas, para indemnizar a falta de ingresos que producirá a fauna silvestre, así como poñer a disposición das empresas e autónomos agrarios subvencións para implementar medidas preventivas, como podería ser o valado reforzado.

Esta iniciativa amosou unha resposta eficaz en Asturias, onde a presenza destes animais é habitual e, a presenza masiva parece ser cíclica. A medida consiste en colocar un valo, enterrado no peche da finca.

Neste senso, os defensores dos animais esperan que a Consellería de Medio Rural “non imite a Medio Ambiente nas ‘solucións’ para evitar a presenza de xabarís en cultivos, estradas ou zonas urbanas”, cuxa única proposta, segundo denuncian os animalistas, foi declara a “emerxencia cinexética temporal” permitindo a súa caza os 7 días da semana.

Libera! aposta pola prevención fronte a desorganización que parece existir na implementación de políticas de convivencia coa fauna silvestre como, por exemplo, a carencia de pasos de fauna en estradas e autoestradas que servirían para facer descender o número de colisións, xerando menos danos persoais e materiais.