Os inspectores de Saúde Pública da Consellería de Sanidade da Xunta de Galicia levaron a cabo esta mañá unha inspección nas piscinas ‘Caldas do Miño’ e comprobaron que o Concello de Lugo cumpriu coa esixencia de rebaixar a temperatura da auga da piscina a 30 graos, adaptándose así ao estipulado no Real Decreto de Piscinas, o que permite a súa vez garantir as condicións hixiénico sanitarias.
En días pasados os inspectores de Saúde Pública constataron que a auga das piscinas estaba a máis de 36 graos de temperatura, algo que só se permite para augas termais ou minerais, no caso de caldas medicinais, ou a 36 graos no caso de hidromasaxes.
Na inspección desta mañá comprobouse a rebaixa da temperatura da auga e tamén se detectaron incumprimentos que deberán corrixir, como é a obrigatoriedade de que a instalación estea dada de alta no Siloe, Sistema de Información sobre Piscinas, do Ministerio de Sanidad; a falta de información aos usuarios e a abundancia de cloro nun dos vasos. Co obxectivo de que o Concello corrixa estes erros, Saúde Pública realizará un requeremento ademais de posteriores inspeccións para garantir o cumprimento de todas estas esixencias, tal e como se fai con calquera instalación deste tipo.
