A mostra 21 S(empre) reúne obras de máis de trinta artistas e do alumnado do IES Alfoz-Valadouro. A apertura será este martes, 15 de setembro, ás 19.00 horas.
O Museo Provincial de Lugo inaugurará este martes, 15 de setembro, a exposición 21 S(empre), un proxecto colectivo que aborda a realidade das persoas con alzhéimer e das súas familias a través da creación artística. O acto comezará ás 19.00 horas.
A mostra, promovida pola Área de Cultura da Deputación de Lugo a través da Rede Museística Provincial, está comisariada por Encarna Lago González e Silvia Fiallega Lorenzo. A iniciativa incorpora diferentes disciplinas e perspectivas arredor da memoria, dos coidados e das consecuencias sociais da enfermidade.
Na exposición participan Caxigueiro, Juanel, Cristina Basanta, Mauro Leivas, Martín Lestao, Belén Mogo, Neira Brochs, Chus Lage, Carmen Llonín, Ignacio Castro “Nachok”, Galiensoup, Lu Vila, Julián Bouza, Alicia Puchades, Carmen Porteiro, Pedro Cabarcos, David Catá, H. Xeada, Laura Díaz, María Jesús Alonso López, Dolores Guerrero, Cris Bamio, Noa Persán, Soila Jankowska, Xoán Vila, Xosé Manuel Otero, Hanoi Vidal, Lomarti, Juan Pablo Mastroianni, Macía, José Manuel Peña Romay e Joana Vilaverde.
Ás achegas individuais súmase o traballo colectivo do alumnado do IES Alfoz-Valadouro. O proxecto tamén conta coa participación de asociacións, persoas afectadas polo alzhéimer, familiares e profesionais dos museos.
A Deputación enmarca esta proposta na colaboración iniciada en 2003 entre a Rede Museística e AFALU. Posteriormente, a institución desenvolveu actividades con AFAMÓN, desde 2007, e coas asociacións AFAN Burela e AFA Viveiro na Mariña. Entre as accións realizadas figuran obradoiros, visitas adaptadas e proxectos vinculados á memoria compartida.
Baixo o lema «O “non” xa non é resposta», a mostra tamén recolle a demanda de CEAFA para que o acceso aos tratamentos e ás innovacións aprobadas non dependa da situación económica nin do lugar de residencia das persoas afectadas.
