Máis de 60 persoas participaron onte sábado nunha ruta guiada pola contorna de Santalla de Bóveda. Foi a cuarta actividade do programa «Sendas para a desconexión», destinado a divulgar o patrimonio natural, histórico e cultural do municipio.
O percorrido, de carácter circular e aproximadamente 4,5 quilómetros de lonxitude, atravesou diferentes espazos do rural lucense. Na actividade participou tamén o concelleiro de Política Social, Gustavo Díaz.
Durante a ruta, o grupo visitou a igrexa de Santalla de Bóveda, declarada Ben de Interese Cultural, e percorreu zonas agrícolas, gandeiras e forestais. O itinerario permitiu achegarse tamén ao núcleo de Bacurín, aos muros de xunta seca e a outros elementos da paisaxe da zona.
Un programa con sete itinerarios
As «Sendas para a desconexión» inclúen 14 paseos guiados distribuídos en sete itinerarios por distintos puntos do municipio. A iniciativa busca dar a coñecer recursos naturais e patrimoniais situados fóra do centro urbano.
As actividades son gratuítas e non requiren inscrición previa, de acordo coa información facilitada polo Concello.
